Gecikməsi olanlar bundan sonra kredit ala biləcək

Azərbaycanda banklarda rəsmi olaraq "qara siyahı" anlayışı ləğv edilib.

banks.az xəbər verir ki, bu barədə Azərbaycan Banklar Assosiasiyasının baş iqtisadçısı Əzizağa Haqverdiyev bildirib.

O qeyd edib ki, artıq banklarda xüsusi olaraq tutulan "qara siyahı" yoxdur.  Əgər vətəndaşın hazırkı maddi imkanı ödənişi etməyə imkan verirsə, ona kredit ayrılır.

"Bununla belə, banklar kredit verməzdən əvvəl vətəndaşın kredit tarixçəsini yoxlayırlar.  Əgər əvvəlki kredit ödənişlərində gecikmələr və ya problemlər olubsa, bu, kredit verilməsi qərarına təsir edə bilər.  Lakin bu, avtomatik olaraq kredit verilməməsi demək deyil.  Banklar riskləri qiymətləndirərək qərar verirlər", - deyə Ə. Haqverdiyev vurğulayıb.

ABA rəsmisi onu da əlavə edib ki, əgər kredit tarixçənizdə problemlər olubsa, lakin hazırda sabit gəliriniz və ya etibarlı zamininiz varsa, banklar sizə kredit verməyi nəzərdən keçirə bilərlər. "Əlavə olaraq, girov qoymaq və ya digər təminatlar təqdim etməklə kredit almaq imkanlarınızı artırmaq mümkündür" - deyə ABA rəsmisi bildirib.