Niyə kredit müraciətimə imtina verildi?

Sosial şəbəkələrdə və müxtəlif platformalarda ən çox verilən suallardan biri budur:

"Mənə kredit düşər?"

Bu sualı hər gün yüzlərlə insan verir. Lakin bu suala bir cümlə ilə cavab vermək mümkün deyil.

Bank və ya BOKT sizin maliyyə vəziyyətinizi bilmədən kredit qərarı verə bilməz. Profil şəklinizə, sosial şəbəkədəki istifadəçi adınıza və ya sadəcə yazdığınız şərhə əsasən heç kim kredit təsdiqi barədə dəqiq fikir söyləyə bilməz.

Bəzən daha maraqlı müraciətlərlə də rastlaşırıq:

"Maşın almaq istəyirəm, kart nömrəm budur, filan məbləğ kredit verərlər?"

İlk baxışdan qəribə səslənsə də, bu tip suallar kifayət qədər çoxdur. Halbuki kart nömrəsinin kredit qərarına heç bir təsiri yoxdur.

Bank üçün vacib olan aşağıdakılardır:

• Gəliriniz;

• İş yeriniz;

• Mövcud kreditləriniz;

• Kredit tarixçəniz;

• Gecikmələriniz;

• Borc yükünüz.

Kredit pul paylamaq deyil

Bir çox insan krediti sadəcə pul almaq kimi qəbul edir.

Əslində isə kredit maliyyə öhdəliyidir. Bank və ya BOKT verdiyi vəsaitin geri qaytarılacağına əmin olmaq istəyir.

Məhz buna görə hər müraciət müəyyən meyarlar üzrə qiymətləndirilir.

Ən çox nəzərə alınan göstəricilər:

• Rəsmi və ya təsdiqlənə bilən gəlir;

• Kredit tarixçəsi;

• Aktiv kredit öhdəlikləri;

• Gecikmələrin mövcudluğu;

• Borcun gəlirə nisbəti;

• İş stajı və fəaliyyət sahəsi.

"Əvvəl kredit götürmüşəm, indi niyə vermirlər?"

Ən çox rast gəlinən narazılıqlardan biri də budur.

Bəzi insanlar düşünür ki, əgər əvvəllər kredit alıblarsa, gələcəkdə də mütləq kredit ala biləcəklər.

Lakin maliyyə vəziyyəti daim dəyişir.

Məsələn:

• Yeni kreditlər yarana bilər;

• Gəlir azala bilər;

• Gecikmələr yarana bilər;

• Bankın risk siyasəti dəyişə bilər.

Bu səbəbdən əvvəl kredit götürmək gələcək kreditlərin də avtomatik təsdiqlənəcəyi anlamına gəlmir.

Kreditorun məqsədi imtina vermək deyil

Sosial şəbəkələrdə tez-tez belə fikirlərə rast gəlinir:

"Banklar kredit vermək istəmir."

Əslində isə bank və ya BOKT yalnız kredit verdiyi zaman gəlir əldə edir.

Əgər müştəri kredit şərtlərinə uyğundursa, kreditorun kredit verməməsi üçün heç bir səbəb yoxdur.

Başqa sözlə, məqsəd kreditdən imtina etmək deyil, qaytarılması real görünən kreditləri maliyyələşdirməkdir.

Heç kim heç kimə borclu deyil

Kredit almaq hər bir vətəndaşın hüququ olsa da, kreditin təsdiqlənməsi bankın risk qiymətləndirməsindən asılıdır.

Kredit təşkilatı müraciəti dəyərləndirir və qərarı mövcud məlumatlara əsasən verir.

Bu səbəbdən kredit müraciətinə imtina almaq hər zaman haqsızlıq və ya qərəz demək deyil.

Maliyyə savadlılığı niyə vacibdir?

Maliyyə savadlılığı yalnız kredit almaq üçün deyil, ümumiyyətlə şəxsi büdcəni idarə etmək üçün vacibdir.

Gəlirlərin planlaşdırılması, xərclərin nəzarətdə saxlanılması və borc yükünün düzgün hesablanması gələcəkdə maliyyə problemlərinin qarşısını almağa kömək edir.

Kredit götürməzdən əvvəl öz imkanlarınızı düzgün qiymətləndirmək, aylıq ödənişləri hesablamaq və riskləri nəzərə almaq vacibdir.

Unutmayın:

Kredit hər kəsə verilmir. Amma maliyyə vəziyyətinizi düzgün idarə etdikdə kredit alma ehtimalınızı artırmaq mümkündür.