"Azərbaycan Kredit Bürosu"nun 200-dən çox tərəfdaşı var

"Azərbaycan Kredit Bürosu" MMC-nin (AKB) tərəfdaşlarının sayı 201-ə çatıb.

Məlumata görə, bunlar 47 bank (21-i ləğv prosesindədir), 61 bank olmayan kredit təşkilatı (BOKT, 5-i ləğv prosesindədir), 35 kredit ittifaqı, 22 sığorta şirkəti (2-si ləğv prosesindədir), 7 lizinq şirkəti, 1 faktorinq şirkəti, 1 kollektor agentliyi, 18 hissəli satış şirkəti (mağaza), 3 mobil operator, 3 kommunal xidmət müəssisəsi və 3 dövlət qurumudur.

Xatırladaq ki, AKB 2018-ci il yanvarın 15-də yaradılıb. Onun nizamnamə kapitalı 2 milyon manatdır. Büronun səhmdarları hər biri 12,5% payla 8 bank - “Azərbaycan Beynəlxalq Bankı", “Bank Respublika”, “Xalq Bank”, “Kapital Bank”, “PAŞA Bank”, “Rabitəbank”, “Unibank” və “Ziraat Bank Azərbaycan" ASC-lərdir.

2021-ci ildə AKB-yə 33,5 milyon adi sorğu, o cümlədən 28,9 milyon toplu sorğu daxil olub. Bundan başqa, ötən il Büro 0,2 milyon skorinq sorğusu da qəbul edib.